بسم الله الرحمن الرحيم
مساء / صباح الخير حبايبي
اليوم حابه اتكلم عن تجربتي لـ ليزر الشعر
الهدف من الاجراء:
تهدف عمليات ازالة الشعر بالليزر لمعالجة نمو الشعر، ومن اجل منع عودته مجددا في مناطق الجسم التي لا يرغب الشخص بنمو الشعر فيها، لاسباب تجميلية، او بدافع علاج الشعر الزائد.
اول حاجه:
انا كنت مره متخوفه من موضوع الليزر بس لمن شوفت صحباتي وقريباتي سووها ارتحت وغير كدا بحثت عن الموضوع كتير لانو انا نوعية جسمي مره حساس
انا سويت الليزر في مركز جيل بلازا بعيادة الموج بجدة
اول ماروحت طبعا اعبي ورقه كامله اسمي وعمري وايش الامراض اللي عند الواحد والخ..
وبعدين دخلت لعند الدكتوره شيكت عليا عشان تعرف ايش لوني وسمك الشعره وهل عندي حساسيه من شي ولالا عشان تقدر تقيم ايش نوع الليزر وقوتو او هل يناسبني الليزر ولالا
انا سويت بس منطقة البكيني والاندر ارم وشنبي
الليزر كان نوعين: النوع اللي سويتو كان يخرج هوا بارد
اول مره سويت فيها كان عاملين عرض بكيني واندر ارم وشنب ب550
والسعر الاساسي البكيني ب 500 والاندر ارم ب300 والشنب ب 100
وطبعا دايما يعملو عروض كتيره وحلوه وفتره الصباح يعملو دايما تخفيض 15%
نتكلم عن تجربتي:
اول مادخلت الغرفه يدوكي روب تلبسي بس وتسالك اسـئله (ماتكوني عامله وقتها لاتقشير ولا تشميس ولا حاطه الديودرنت ولا شي ) حتى وقت ماتروحيلهم ماتشيلي شعر جسمك هما يشيلولك بالموس عشان يعرفو منابت الشعر
ومعلومه مهمه اول ماتبداي تعملي الليزر ماتشيلي جسمك حلاوه ولا شمع ولا اي شي ليش؟؟ لانو لو شلتي حلاوه حيضيع تعبك ولاكانك سويتي ليزر حيرجع يطلع من اول وجديد.
بعد كدا الفنيه تمرر جهاز اليزر في المنطقه المطلوبه في الجسم وحيكون الاحساس زي لسعات خفيفه ماتعور وماشالله يدهم خفيفه والعمليه هادي تستغرق دقايق بس مو كتير وبعد ماتخلصي من الجلسه تحطلك كريم فيبوساكت لونو اصفر وتقعدي 4ساعات ماتقربي المويه من المنطقه وتقعدي 3ايام ماتحطي ديوديرنت وخلال التلاته الايام تحطي الكريم صباح ومساء.
وبعض ناس يطلبو تخدير مرهم يحطولهم بس لانو انا نوع الليزر ماكان يعور فماطلبت
والنوع التاني لانو شويه قوي يحتاج ممكن بنج
وبعد ماتخلصي تديلك استبيان تعبي
وفي شي اسمو رتوش او ريتتش ايش هادا؟ عباره عن اعاده ليزر يعني من عاشر يوم لـ 15 يوم في دي الفتره تروحي تسوي جلسه ليزر مجانا
كم يستمر ويطلع الشعر: اول جلسه تقعد شهر ويبدا يطلع شعر خفيف من اول جلسه حتلاحظي الشعره حتسير خفيفه وناعمه ومع الجلسات الباقيه حتخف
انا دحين سويت تقريبا 7جلسات وسرت كل تلاته شهور او اربعه تقريبا واروح اسوي الجلسه اللي بعدها
صراحه تجربه مريحه وممتعه وانصح كل البنات يسوو ليزر ومافيها ضرر ان شاءالله
وهيا علاج كمان اللي يطلعلهم حبوب بعد نتف بالحلاوه او بالموس الليزر حيكون علاجهم بااذن الله
واي استفسار اسئلو..
ليست هناك تعليقات:
إرسال تعليق